أســـــــــــوان 2.5 الفجر

جميله اسوان قوى ..

تطلع تتمشى بعد ما تكون قضيت وقت مع اخواتك ومع كل اللى بتحبهم ..

من العقاد لغايه ما تخلص تقريبا نص الكورنيش .. وعند المنظر ده بالظبط .. تقعد

وتفضل طول الليل ..

وانت قصاد المنظر الجميل ده .. والهواء الرائع

بتبقى فى شعور غريب " حاسس قوى " بس مش عارف .. !!

فتحت الأسماء فى الموبايل عايز اكلمه

اقوله تعال المنظر والقعدة دى والله هتفوتك ..

ألبس يلا وتعال هنقعد سوى

فضلت أدور على اسمه .. وأدور وأدور

ملقتهوش .. !!

ومن الزر الاسود الظريف اللى بيبقى من فوق .. عملت الموبايل خارج الخدمة

وأتمشيت لغاية -ألف ليلة وليلة- ... " بالمناسبة انا نفسى أقرأ القصة دى "

المهم ده حلوانى روحت اشترى " سفن اب اللى بالليمون كتير " وباكو سجاير احتياطى

انا بحب السفن .. بس بتاع الليمون ده مش حلو ..

ورجعت اقعد فى نفس المكان ..

وفضلت فى مكانى لغاية لما أذن الفجر .

وتقريبا روحت بعد كده .. !؟

|