0
~~ علـــى سلامـــه ~~
Posted by SAD clown
on
6:08 ص
النهارده روحت الشغل بدرى .. قبل المواعيد يجى بساعتين تلاته
دخلت النت .. مليش نفسى اشاتى مع حد .. ناس لابسه وشوش .. بتقول كلام وكلام تانى تحوش
جه فى بالى على سلامه..
كانت بتقول عليه منى الشاذلى بتاعت العاشره مساء
السهل الممتنع المتجدد ... مش فاهم ولا تعبير فيهم
بس هو يستاهل كل خير .. واى كلمه فى حقه لازم تكون حلوه ..
بجد زى ما هو بيقول ..
" معلش بقى اسمحلى لو هنتكلم على الحلاوه انا تقطيعى مجرمه ..
صحيح وودانى كبيره ..
لكن منخيرى منمنه
وكل ما اطلع سلمه يقولولى شد حيلك لسه بدرى ع السطوح ...
عيونى جرئيه جرئيه ..
لكن فى الحقيقه لا بتعرف تدارى ولا تقدر تبوح ..
شعرى صحيح مش ناعم .. لكن لايق على راسى ..
ولما يصدق احساسى معرفش فين من روحى أروح ..
بحبك لما بتستعبط وتقولى مالك .. وبتبكى ليه ومن ايه كده مجروح .. "
على فكره هو فيه الصفات دى بجد فى روحه الطيبه .. ولسانه الجدع .. اللى واقف مع حالنا بجدعنه ..!!
روحت على الـ you tube وتقريبا ساعتين واكتر .. وانا بسمع له .. وكل شويه اصقف ابتسم ..
واوقات تنزل دمعه فى سكات
شدنى قوى المقطع ده .. قولت لازم اجيبه هنا علشان ادخل اسمعه براحتى ..
شدنى قوى المقطع ده .. قولت لازم اجيبه هنا علشان ادخل اسمعه براحتى ..
ياااااااااااه على احساسه ... بجد جامد جدا .. والعود بردو عامل شغل يعنى ;)
هو له اشعار كتيره ... بس دىكام وحده عجبينى ...
ميزان حياتي
ناقص حته
وكل ما أوزن
ألاقي لسه
ناقصلي حته
أحط حته
تقل حته
وأجيب قميص
تضيع چاكته
وأعيش لي ساعة
يفوتني سته
وكل ما أوزن
ألاقي ناقص
أقول بناقص
لو هي حته
أتاري لسه
ولسه تاخد
سنين وحته
وحاجات تسيبني
وحاجات تاخدني
لحاجات تخبط
في كل حته
وأقول ها نفرح
ف يوم
ها نفرح
ويوم مانفرح
علي الله يفضل
في القلب حته
بجد الله عليك ...
خصوصاً لما بيقولها الرائع وجية عزيز
ودى كمان
خصوصاً لما بيقولها الرائع وجية عزيز
ودى كمان
مــرايا
قلت أبص ف المرايا
يمكن أكون إحلويت
فضلت داير أبص
مخلتش ولا مرايا ف البيت
في الحمام ف الأودة ف دولاب
أو متعلقة ع الحيط
شوفت
سكت شويه
وبعدين إتخضيت
معقول أنا قضيت العمر ده كله
وزي ما روحت زي ما جيت
معقول أنا عمري مافكرت ولا إتغيرت ولا حبيت
وإزاي ساكت علي روحي ده كله
وليه إستنيت يا ريتني ما كان عندي مرايا
وياريتني ما بصيت
ودى مش فاهم منها حاجه بس جميله بردو .. مفيش مشاكل
أحب العسل
وأموت فى الكسل
ووقت الأزمه أقول فى العشق حكمه ومثل
وبس خلاص
أهجص ألاقى ميت مليون هجاص
أفكر هس لا صوت ولا ناس
لأنى كده ثقافه وعلم يادوب فى الفيلم فى الكراس
مفيش أحلام مفيش أحساس
وكمااان دى واحد ابن حلال مشكلها
حَظّك اليُومْ…
زَىّ إمْبارحْ…
زَىّ كُل يُومْ…
ومَفيشْ حَاجةَ متْغيّرةْ…
الْبت الطّويلَة عَايزَاكْ…
بَسَ إنت عَيَنكْ ع الْقُصيرةْ…
يَا لَئيمْ…
بَسّ إبن حَلاَل وطيّب…
وتِستاهل كُل خير…
وحِتّة سُكّرة…
شُوف…
الزَّهْرة مع الْمرّيخْ وعَطَاردْ…
وشْويّة كَوَاكب كَدهْ…
عامَلين معاك شُغل…
آخرْ مسْخَرَةْ…
تطْلَعْ منْ إنتخَاباتْ…
عَلَى استفْتَاءاتْ…
وَحَاجَاتْ ومحْتاجَات…
وبيعْ وسَمسَرةَْ…
وإنتَ ماَشَاء الله عليِك…
غَزَالْ يا رَبّى…
لاَ هَمّك إشاراتْ…
ولاَ مْطّباتْ…
ولا شَوَارعْ مِكسّرة…
شُوفْ…
التّعْليمْ…
زَىّ الْقَديم…
والصحّة رَبّنا يُسْتُر…
مَتتْخَضّش كدَه يَاعَمّ…
إيه يَعْنى الْلى جَرَا…
عَنَدكْ وحَاجَاتْ…
وَحَاجَاتْ تَعْديِلْ…
وَحَاجَاتْ…
تتْغَيّر ف التّوْكْيل…
وَحَاجَاتْ مَعَدْتَش تِنْفَعْ خَالصْ…
وحَاجَاتْ عَايزَةْ…
بوَية وسَمكّرةْ…
شُوفْ…
مَعْمولّك عَمَلْ مَرْبُوطْ…
فِى ديل قرْد شَقِى وَمحْطُوطْ…
فَ حَاجة مدَوَّرْةْ…
وبَعْد نُقْطُتينْ…
راَيحْ حتّةْ…
اللهُ أْعَلَمْ فِينْ…
لا ليها عُنوَان منْ قُدّام…
ولا مِنْ وَرَا…
كله جميل جداً
لو موصوفلك
لو موصوفلك ترجع…..جوة الهيصة
وعيش
لو موصوفلك ترجع….روح ويارايت
متجيش
لو موصوفلك تضحك……اضحك
على أحزانك
لو موصوفلك تعشق…حب واقف فى
مكانك
لو تختار فى زمانك……..أحسن
ماتنقيش
لو موصوفلك تحلم….قضى الليل
بردان
واعمل روحك ترتاح….ناسى انك
انسان
لو موصوفلك ترتاح….نادى وقول
يا جراح
ما يغركش براح ساكت ما بيبكيش……
ساكت ما بيبكيش !
:)
كفاية بقي
بجد كانوا تلت ساعات حلوين قوى ...
عودة للواقع ... زى ما بيقول مرهف أبو نيمو ... :)
يلا بيا بقى اقوم اشوف شغلى .. والله كريم
سلاموووو
|
